లాయర్ వృత్తికి గుడ్ బై.. కుక్కలతో వాకింగ్.. రోజుకు రూ.50 వేల సంపాదన!

లక్షల్లో జీతం, సమాజంలో గౌరవం ఇచ్చే న్యాయవాద వృత్తిని వదిలేసి, కొందరు ఊహించని రంగంలోకి అడుగుపెడుతుంటారు. సరిగ్గా ఇలాంటి నిర్ణయమే తీసుకున్నారు యూకేకు చెందిన 30 ఏళ్ల లిజ్ ఈస్ట్. క్రిమినల్ లాయర్‌గా స్థిరపడాలన్న లక్ష్యాన్ని పక్కనపెట్టి, పూర్తిస్థాయి డాగ్ వాకర్‌గా మారారు. ఇప్పుడు ఆమె రోజుకు 300 నుంచి 400 పౌండ్లు (సుమారు రూ. 38,500 నుంచి రూ. 51,400) సంపాదిస్తూ అందరినీ ఆశ్చర్యపరుస్తున్నారు.

లిజ్ ఈస్ట్ సుమారు నాలుగు సంవత్సరాల పాటు క్రిమినల్ డిఫెన్స్ రంగంలో పారాలీగల్‌గా పనిచేశారు. ఈ సమయంలో కోర్టుకు హాజరవడం, అడ్మినిస్ట్రేషన్ పనులు చూడటం, జైలు సందర్శనలు వంటివి చేసేవారు. అయితే, ఈ వృత్తిలో గంటల తరబడి పనిచేయడం, తీవ్రమైన ఒత్తిడి, జీవనశైలి తనకు సరిపడలేదని ఆమె గ్రహించారు. ఆ ఉద్యోగం తన శక్తిని హరించివేస్తోందని, దీనిని ఎక్కువ కాలం కొనసాగించలేనని ఆమె భావించారు.

ఇదే సమయంలో డాగ్ వాకింగ్, బోర్డింగ్ వ్యాపారం చేస్తున్న తన భర్తను చూసి లిజ్ స్ఫూర్తి పొందారు. దీంతో న్యాయవాద వృత్తికి రాజీనామా చేసి, మొదట్లో ఒక పబ్‌లో పనిచేస్తూనే నెమ్మదిగా డాగ్ వాకింగ్ కోసం క్లయింట్లను సంపాదించుకోవడం ప్రారంభించారు. ఏడాది తిరిగేసరికి ఆమె వ్యాపారం అనూహ్యంగా వృద్ధి చెందింది. ప్రస్తుతం ఆమె రోజుకు నాలుగు గ్రూపులుగా 20 నుంచి 30 కుక్కలను వాకింగ్‌కు తీసుకెళ్తున్నారు. ఒక్కో శునకానికి గంటకు సుమారు 14 పౌండ్లు ఛార్జ్ చేస్తున్నారు.

గతంలో కార్పొరేట్ ఉద్యోగంలో పనిచేసినప్పటి కంటే ఇప్పుడు సగం పని గంటలతోనే నెలకు వేల పౌండ్లు అదనంగా సంపాదిస్తున్నానని లిజ్ సంతోషంగా చెబుతున్నారు. అయితే, కేవలం డబ్బు కోసమే కాకుండా జంతువులపై నిజమైన ప్రేమ, ఆసక్తి ఉన్నవారే ఈ వృత్తికి సరిగ్గా సరిపోతారని ఆమె స్పష్టం చేశారు. నచ్చిన పనిని ఎంచుకోవడం వల్లే తాను ఇంత సంతృప్తిగా, విజయవంతంగా ఉన్నానని ఆమె తన అనుభవాన్ని పంచుకున్నారు.